Cap 1 (Parte F)
-
e cussì foi ca capìu fae pe’ ciciri, li ottu giurni te posatura, ddintara le fiate ca s’ia bungire allu giurnu, li tthre giurni te riposu te lu nguentu, dintara le ure ca s’ìa friculare ogni fiata, le tre fiate ca s’ìa bungire allu giurnu, ddintàra le simàne ca s’ìa fare ddhru trattamentu e la pinna te caddhrina dintàu n’ala! Perciò quannu tisse a muglierasa cu lu fricula li spiecàu: “iti ca m’hai friculare cu delicatezza e cu nu certu mpegnu per tre simàne, tre ure la fiata, pe’ ottu fiàte allu giurnu e cu n’ala te caddhrina. Iti ca te lu panaru miu se tratta, none te lu tou! Perciò statte ccorta ca se no pigliu na mazza e te le tau comu Diu cumanna.
-
Già e quiddhra cu nu le piglia te maritusa se mpegnau comu mai ìa fattu an vita soa e ne lu rrussicàu bonu bonu comu nu pipitiàulu, ci cu spunna cchiu sutta ca stae! Lu tiàulu ticu! – Tisse San Pietru, tuttu russu an facce.
-
Beh! E mo’ ce boi te mie, se quiddhru s’ìa mbriacatu e nu ìa capitu? Anzi, furtuna comu me inne! Ca ddhru fessa cìu dopu ddo’ giurni a ddhra muglierama, castimannu comu nu turcu, e critàu: “Mesciu Giuanne! Mesciu Giuanne! Chiessi! Moi, hai bissìre! Ca te n’aggiu dire quattru! Chiessi o te ne minu la porta”. E mentre priticà e crità comu li tannati, crattannuse lu panaru comu sia ca la manu era na zappa, tirà cauci alla porta e tafari, ca sìa spellate le ticite. Muglierama, bianca an facce pe’ la paura, issìu addhra fore, ca n’auru picca s’ia fatta subbra e lu ddimmannàu: – Ce bete? Ce ha successu? Mesciu Totu ce boi? Ce bbhai critannu a pacciu?
-
Chiamame marituta ca l’aggiù dire! Ca oci fazzu scinna lu cielu an terra!
-
Poi fare scinnire puru lu sule ca quiddhru nu bene! Ha sciutu alla fera te Galatina cu binna la ciuccia, ca s’ia fatta ecchia, e cu se ccatta nu porciceddhru cu se lu crisca.
-
Ah, sì? Nu nc’ete ? Allora, quannu torna, tilli allu tuttore te marituta, ca iddhru m’ha scunsatu e ca iddhru stessu m’ha ggiustare, ca se lu panaru miu nu torna lisciu lisciu, profumatu e originale comu era prima, li fazzu bitire na cosa ca nu ha mai ista! Tilli ca iddhru m’ha scunsatu e ca iddhru stessu m’ha cunzàre, se no ci sape ce succede! – Allora, hai capitu San Pietru comu cera le cose? Chieu ce centru? Foi iddhru ca se mbriacàu!
(continua crai)