Cap 1 (Parte G)
-
Meh! Va bene, ah! – Tisse San Pietru, rassegnatu. – Comu la giri giri, troi sempre la ragione bessa la toa. Mo’ iti ce poi fare, iti se te ne face n’aura. Me pare nu picchi difficile, ma nu se sape mai. Dimmannalu lu Signore, ca cu tutta la misericordia ca tene, pote essere ca te perduna e te face n’aura crazia. Cercanneli n’aura, ca me pare propriu ca stae te capu, oci. Ma sta fiata, pe’ amore te Diu, statte attentu a quiddhru ca tici! Cercali la crazia te l’anima e nu parlare né te seggie, né te pire, se no quannu mori allu nfiernu te n’ai! Tine sulamente: Signore famme st’urtima crazia, quannu sarà ca m’hai chiamare, cu me ne porti l’anima an Paratisu. Hai capitu? Cuarda ca quista ete l’ultima ca li poi cercare. Ca suntu già tre crazie; ca una li ale pe’ iddru, una pe’ Sirasa, ca ete puru Sire nosciu, e una pe’ lu Spiritu Santu. Dopo te trete, lu Signore se azza e se n’ae. Perciò statte attentu a ce faci e a ce dici!
-
Sine! Sine, va bene! Aggiu capitu! Allora, mo’ ne la cercu!
Cussì Mesciu Giuanne ancora cchiù lestu e prontu te l’aure ddo’ fiate tisse:
-
Maestru!…
-
Ehi, Mesciu Giuanne, timme! Ce boi? – rispuse lu Signore.
-
Se é possibile, ulìa n’ultima crazia … – tisse iddhru quetu quetu.
-
Eh! Ce crazia oi ntorna? – Lu ddimmannàu pacinziusu Gesù.
-
Sempre se me la concedi, Signore! – tiràu trittu Mesciu Giuanne. – Tegnu nu saccu ca tutti lu pigliane, ci cu se coglia le ulìe, ci cu nci minta le cose cchiu strause, o pe’ na cosa o pe’ l’aura stu lampu te saccu lu iciu, si e no, la matina quannu me azzu e la sira quannu me curcu, sempre se ci se l’ha pigliatu se ricorda me lu nnuca. Ticu, te pare na cosa giusta quista, cu nu bessu mancu patrunu te lu saccu miu? Cuarda, nah! Tantu hane fattu ca ha tuccatu lu ripezzu! Perciò, Signore miu beddru, famme st’urtima crazia, ca cinca lu piglia cu nci ncoddhra a ddhra nfacce!
(continua crai)