CAP II (Parte A)
Quannu Mesciu Giuanne se ncontràu cu Mefistofele
Dopu ca San Pietru e lu Signore se n’ìane ciuti, Mesciu Giuanne ìa continuato campa comu ìa sempre fattu; fatià comu nu ciucciu pe’ tuttu lu giurnu e se spinnìa quasi tutti li sordi alla sira intra la putèa te mieru te la chiazza cu certi amici soi ca se mintìane d’accordu cu lu pulizzane. Nu bete ca era fessa, ma se sape ca “allu saputu li scalane li causi” e ca ci se crite troppu furbu, troa sempre quarchetunu cchiù furbu te iddhru cu lu fazza fessa.
Tuttu quistu capità ogni giurnu pe’ tuttu l’annu, ma quannu rià lu mumentu giustu, ca se bbicinà lu mese te la ricorrenza te li Santi Martiri, Mesciu Giuanne spiccià te ciucare e se ccuglìa li sordi cu fazza na festa cranne alli cchiù cranni Santi, ca a iddhru cchiui li parìane putenti e bicini allu Signore, percene invece cu rinunciane alla fede cristiana ìane accettatu megliu lu martiriu. E tantu ìa ddintatu tivotu, ca spinnìa tuttu quiddhru ca ìa cuatagnatu intra n’annu pe’ la festa e la facìa tantu cranne ca nvità tuttu lu paise, sinnicu e arciprete annanzi a tutti, e nu nc’ete mancu bisognu cu se tica no? Tutti spittàne bessàne nvitati cu mangiane e cu bìane senza pàcane.
Ddhr’annu però, certi amici soi, se mpattàra e li mìsira te scusi na polverina bianca intra lu mieru. Ddhra polverina li fice fermentare an corpu tuttu lu niurumaru, tantu ca Mesciu Giuanne mpassuddràu prestu prestu, senza mancu se ne ccorga, e quannu se ddiscitàu se itte sulu e senza cchiui nu sordu an pàuta.
(continua crai)