LU SCARPARU TE LU TIAULU

di Franco Candido

Cap III (Parte C)

• Eh, àzzate!… – tisse Mefistòfele senza se ntisa. – Te pare facile? A quai aggiu ncuddhratu e nu me fitu filu me azzu!

• Uhé, menzu tiaulu! – critàu Mesciu Giuanne turnannu arretu. – Ma sta me pigli pe’ scemu? Prima tante lampu te storie cu ne sbricamu e mo’ te stai sittatu come nu fessa, commutu commutu, sulla megliu seggia te casa mia?! Azzate e sbricate, nu me fare perdire tiempu! –

• None, none! – rispuse lu tiaulu cutulànnuse comu nu pacciu sulla seggia. – Nu me fitu filu me azzu! Nah, cuarda! Nah! Puru ca ogliu cu me azzu, nu nci la fazzu! Aggiu ncuddhratu sulla seggia! Aggiu ncuddhratu propriu!

– Fermu! Fermu ca me la sconi tutta! – critàu ntorna Mesciu Giuanne cu le manu intra li capiddhri.

– Quetu, t’aggiu tittu! O te pigliu cu lu minaturu!

• Ma chieu aggiu ncuddhratu sulla seggia, nu mboi capisci? Aggiu ncuddhratu sulla seggia! Nah, cuarda! Nah! Puru ca ogliu nu me fitu me azzu! – e mentre ticìa cussi zzumpa subbra e sutta, cu tutta la seggia, cu bìcia se se azza.

Mesciu Giuanne, itennu ca la seggia soa inìa maltrattata a ddhru simile motu, nu nci itte cchiui, pigliau lu minaturu e ncignau ne le sona allu timoniu te santa ragione.

• Nun boi te azzi?! – critàu allu messaggeru te Luciferu, cu lu minaturu ca cia e bbinìa sulla capu te ddhru poru tiaulu. – Nu mboi capisci ca t’hai stare fermu sulla seggia mia? E mo’ te fazzu bitire chieu na cosa!

• Ahi! Ahi! Lassame stare! – crità Mefistòfele, cu le manu azzàte cu se ripàra comu meglio putìa te ddhra furia scatinata te cristianu e te minaturu: – Lassame stare ca sta mme cciti! –

• àzzate e sciamune! – crità Mesciu Giuanne, minannu corpi senza senta ragioni, comu n’invasatu. – Nu mbulii me ne porti? Nu mbulii me futti l’anima? Nah, ce te pigli! Auru ca l’anima! Nah! Pigliate quistu! E quistu! E st’auru!

(Continua crai)