LU SCARPARU TE LU TIAULU di Franco Candido

Cap III (Parte D)

Mesciu Giuanne crità e minà corpi a ddhru poru tiaulu ca ìa ddintatu russu russu e chinu te ozzi; crità e minà corpi te minaturu an capu, sulle spaddhre, sulle razze, sulle aluzze, ca siane menze sconate, sull’anche, sulla cuta a rischiu ne la mmuzza. – Ma cuarda e biti stu fessa! Chieu ogliu me n’au e iddhru none! E ca sta me spezza la seggia bona puru! àzzate! àzzate! – e cchiui lu tiaulu crità ca se tulìa e cchiui iddhru ne le tia e cchiui ne li tia e cchiui lu strulicà.

Alla fine, Mefistofele, cu le manu an facce e chiangennu comu nu cuagnone, critàu disperatu.

• Basta! Basta! Sta mme cciti! Nu ne pozzu cchiui! Lassame stare ca te tau ce boi! Te fazzu riccu! Te tau quanti sordi oi! Te tau teice anni auri te vita! Lassame stare! Nu tieni nu picchi te pietà?

• Ce bete? Ce bete? Ce hai tittu? – tisse Mesciu Giuanne cu lu minaturu all’aria, prontu li tecia n’auru corpu. – Aggiu ntisu bonu? Hai tittu pe’ casu ca me tai teice anni auri te vita? –

• Sine! Sine! – rispuse lu tiaulu. – Te tau teice anni auri e puru tutti li sordi ca oi cu faci sempre festa! Te tau quiddhru ca oi, basta ca me lassi stare!

Mesciu Giuanne nu li parse veru e lassau lu minaturu.

• Ah, moi te conzi! – tisse cu li suturi ca li sculàne te capu pe’ lu sforzu ca ìa fattu lu bìnchia te mazzate. – Mo’ sta ragioni bonu! Sta me piace stu discorsu e perciò te lassu stare. Firma, però! Piglia ddhru quaternu russu e firma! Ca sta fiata lu pattu ha tinire tutti li crismi te la legge e lu contrattu ha béssire scrittu in bella e doppia copia e una me laggiù tinire puru chieu! Nah, firma! Caccia li sordi e poi abbatine e nu te fare bìtire cchiui pe’ teice anni auri!

  (continua crai)