LU SCARPARU TE LU TIAULU di Franco Candido

Cap. VII (Parte B)

Tutti li sudditi te l’oltretomba se ficira piccinni piccinni te fronte alla raggia te la caputiaulu. Li timòni nu se fitàne cu lu cuardane intra l’occhi, ca lu sguardu li fiammeggià come ampa te focu ardente, le tiaulesse cuardàne an terra timiruse e le sciàre, ca erane tiaulesse te ripiecu, te secondu ordine, se scunnìane arretu lu manicu te lu scuparieddhru loru, cu nu se fazzane bitire. Ma ci lu calmà? Fiammeggià te l’occhi, li scappà fumu te lu nasu, li issìane discorsi te focu te la ucca, Luciferu parìa nu timoniu mpizzicatu, tantu se lu mangià la stizza pe’ curpa te Mesciu Giuanne.

Te fronte a ddhru spettaculu, Asterutte, ca ìa sempre lottatu contru Setteranfe cu se cuatagna li favori te lu patrunu te l’auru munnu, itennu ce l’ìa successu allu rivale, pinzàu ca ìa rriatu lu mumentu se fazza annanzi, cu se conquista la malevolenza te lu capu supremu te lu male, na fiata pe’ tutte. Stu timoniu peccatore, ca tutti timìane pe’ la furbizia ca tinìa ncuddhrata subbra comu na seconda pelle, capìa ca se riuscìa cu futta l’anima a Mesciu Giuanne, putìa ire comu premiu lu postu te viceré te lu nfiernu, ca era ancora libberu, percene quiddhru putìa éssire lu premiu giustu pe’ cine, comu a iddru, ìa sempre servutu, cu cattiveria crutele, lu male cchiù assolutu alli cumanni te lu principe nfernale.

Maestà, – tisse mentre se facìa annanzi cu n’inchinu rispettosu.
Ce boi!? – li critàu lu re te l’inferi puntannuli contru lu furcune. – Te tau licenza parli, ma se hai dire puttanate, ete megliu te stai cittu, se no te tau nu corpu cu stu’ giustaosse!
Sulu ddo’ parole! – tisse cu n’auru lestu salameleccu Asterutte cu la uce ca già li trimulà. – Nu riescu capiscu lu motivu te ce ha successu alli ddo’ timoni ca s’ane fatti pigliare pe’ fessa te Mesciu Giuanne, ma certamente tieni ragione cu mini focu e fiamme pe’ la minchialità ca hane dimostrata tutti e ddoi. Però, se possu tire, sta sbagli cu bai tie te persona. Te sicuru, nu nci ole nienzi cu ne li nuci l’anima, ma ne ale la pena cu te scòmmuti? Se pe’ ogni cristianu ca imu futtire allu Paratisu t’hai fare tie tanta strata, ce nci staune a fare tutte le migliare te tiauli ca bìune e mangiane a spese toi intra le spelonche nfernali? E poi ce hane dire an Paratisu e an Purgatoriu, ca nu tieni mancu nu tiaulu capace li futta l’anima a nu cristianuzzu armatu te na seggia, te nu piru e te quarche scatula te coddhra? Sai cce ficura ca facimu puru te fronte all’anime tannate ca ardune intra lu focu eternu? Se quiddhre capiscune ca puru a nui ne potune pigliare pe’ fessa comu ha fattu Mesciu Giuanne e se ìtune ca tie nu nci sinti e ca n’hai lassati suli, giustu bai te futti na sula anima sulla terra, quai pote capitare te tuttu e pote éssire ca quannu torni tocca bai te troi casa.
Umh!… – fice Luciferu cu na manu a sutta all’angalieddhru. – Aggiu sempre pinsatu ca nc’era quarchecosa te originale intra lu cervieddhru tou e moi sta me ne dai la conferma. Sarai ca tici bonu e ca ete megliu se stau quai cu quatru li cunti, ma addhrai ci mannu? A ddhru lu trou unu tantu trittu o, se la ticimu fra de nui, tantu fessa, cu bacia ne nuca l’anima te ddhra urpe sulla terra?
Au chieu! – tisse Asterutte cu nu certu orgogliu. – Tamme la possibilità te dimostru quantu agliu e te fazzu bitire ca suntu megliu chieu sulu ca iddhri ddoi misi nsieme!
Quasi quasi ca hai ragione. Tantu cchiù fiacca te quantu n’ha sciuta comu n’ha scire ancora? Cu lassu lu nfiernu te sulu nu bete cosa, ca sti quattru scemuniti te tiauli cuardiani su capaci me fazzane futtire lu postu te caputiaulu. Allora, Asterutte facimu comu tici tie! Ane sulla terra e nucime l’anima te Mesciu Giuanne, ma apri l’occhi cu nu te faci futtire puru tie, se no me sienti. E statte attentu ca se te offre la seggia e nu café o nu piru vuol dire ca ole te fazza ncuddhrare e cu te binchia te corpi.
A mie nu me futte Maestà, statte sicuru! – tisse l’urtimu tiaulu curaggiosu, l’urtima spiranza te l’aldilà. – Te nnucu l’anima te Mesciu Giuanne, stracinuni, ttaccata cu centu catine! – e cussi ticennu spunnau insieme a Luciferu ca ormai, tuttu priciatu, già sta li facìa le feste, ca se critìa ca ìa truatu nu cumpagnu degnu te lu ruolu ca tinìa, n’abile vendicatore te l’onore sou e de tuttu lu regnu te l’oltretomba.