Cap. XVI (Parte A)
QUANNU MESCIU GIUANNE DINTAU SANTU
San Pietru nu riuscìa se ne fazza na ragione te quantu ìa decisu lu Signore. Nu riuscìa cu capisca percène Mesciu Giuanne, te gran peccatore comu ìa statu te iu, tuttu te paru putìa ddintare santu te mortu. Cia e binìa te la nicchia te San Tommasu se cunsiglia cu iddhru ca, pe’ lu fattu te critire o nu critire a certe cose, era lu santu cchiù spiertu te lu Paratisu. Perciò, tutti e ddoi insieme se nginucchiàne o se sittàne queti queti cu Santa Pacienzia, ca ormai ccumpagnà San Pietru addhrunca cia. Tutti e ddoi studiàne e ristudiàne la Bibbia, lu Vangelu, lu Testamentu ecchiu e puru lu nou e li Atti te li Apostuli e tutte le scritture Sacre cu bìciane se nci capìane quarche cosa a ddhru misteru, ma nienzi te fare: na situazione particolare comu a quiddhra te “lu scarparu te lu tiaulu”, comu ormai s’ìane mpattati cu lu chiàmane, nu nc’ia mai stata a tutta la storia te la Chiesia.
-
Signore miu, – li ticìa a Gesù, – nu ca ogliu te ciuticu pe’ le decisioni ca pigli, ca tie nu ne sbagli mai una, quistu se sape, ma sulamente ete ca ulìa capiscu percène ddhru menzu tiaulu te scarparu pote ddintare santu e tante aure anime bone hane spittare seculi cu béssane ammesse alla presenza toa. Ce ha fattu quistu an vita cu se merita tantu an morte?
-
San Pietru miu, nu te preoccupare, – rispunnìa Gesù, – dimmanname puru tuttu quiddhru ca oi ca la Chiesia mia, la sai, su de tie se poggia, ca tie sinti la petra ca mantene tuttu lu nsegnamentu miu. Ete giustu cu sai le cose e cu capisci lu tuttu ca se no comu faci cu mpari l’auri? Nu bete ca aggiu fare pe’ forza tuttu chieu!
-
Grazie pe’ la fiducia Gesù miu! Ma chiutame cu capiscu, ca ddhru furmine te cristianu me ne face cire te capu! Ce ha fattu mai quistu te bonu?
-
Eh! Ce ha fattu? Intantu, nu m’ha mai rinnegatu comu a tie, ca me rinnegasti tre fiate, se te ricordi, ma lassamu perdire ca ormai quiddhru ca ha statu ha statu.
-
Eh, Signore! Sempre addhrai batte lu chiou! T’aggiu già cercatu perdunu none una, ma mille fiate, ce aggiu fare te convincu ca m’aggiu pentitu e strapentitu te ddhra mancanza te fede? Eh! Ca poi, se ulimu la ticimu tutta, se trattà puru te la pelle mia! Ce te criti ca tutti lu curaggiu tou tinemmu? E poi, se propriu l’imu dira chiui te tutta, nu m’aggiu riscattatu te ddhru piccatu? Nu m’aune misu an cruce puru a mie? Puru ca suttasubbra, sempre an cruce aggiu spicciatu! Spettate ca Mesciu Giuanne face lo stessu, nah! Quiddhru l’auri minte an cruce, none iddhru stessu!
-
San Pietru, nu fare ntorna piccatu, abbi fede, ca a quai an Paratisu stamu! O t’hai scerratu? Mesciu Giuanne ha tinuta na religiosità ca tie nu te poi mancu ‘mmaginare!
-
Sì? E ce ha fattu te tantu pregiu?
-
Intantu, m’ha cercate tre grazie!
-
Sine, ete veru! Quiddhre te la seggia, te lu saccu e de lu piru! E ce grazie suntu quiddhre?
-
Comu ce grazie suntu? Cu quiddhre ha struncuniciati tre timoni te li cchiù brutti e quiddhru ca ete cchiù importante ha scuscinatu te corpi puru Luciferu e nu’ sulamente l’ha fatta la facce a marangiana, ma l’ha fatta fare na ficura ca se la ricorda pe’ l’eternità. Se pensu a comu l’ha pigliati li baffi cu la tanaglia, ne l’ha nturtigliati boni boni e ne l’ha nchiuati an facce allu purtune te lu nfiernu, me ene li tau nu bellu premiu e cu lu fazzu Santu senza nuddhra trafila!
-
Ma Signore miu beddhru… Certamente, s’ha trattata te furtuna…
-
Ma ce furtuna e furtuna, caru Pietru, quiddhru ne sape una cchiui te lu tiaulu e, se permetti, combattenti cussì forti, furbi e chini te curaggiu ete megliu steciane te la parte mia ca te la parte loru!
-
Gessummaria! Sine! Nu te ticu te none, ma propriu percé n’ae cunbinannu sempre una cchiui te lu tiaulu ete pericolosu. Quiddhru una ne face e centu ne pensa. Poi, comu li aune aune le cose e ci cappa cappa te sutta, ce se ne futte!
-
San Pietru, nu bete ca sinti nu picca nvidiosu, pe’ casu? Ca se no sempre piccatu faci!
-
None, Maestru! Nu sia mai! Tie me canusci! Nu bete ca su nvidiousu. Lu fattu ete ca siccomu n’ha cumbinate tante, ormai sacciu ce li fita an capu e ca addhru nc’ete iddhru succete sempre quarchecosa te fastidiosu pe’ l’auri, mentre iddhru galleggia e se face lu beddhru.
-
Ma poi, pensa a quante cose ha fatte sulla terra e sempre an gloria mia: le feste alli Santi Martiri, lu restauru te lu seminariu, le misse cantate ogni duminica, lu mieru bonu ca ha ricalatu alla Chiesia pe’ la missa, tutti li sordi c’ha mpristati alli puarieddhri senza interesse. E poi e poi…!
-
Sine, Signore, ma erane tutti sordi te lu tiaulu! Tutti te intra ddhra cascetta li piglià!
-
E ce boi? E se lu tiaulu era tantu fessa ne li tecia, iddhru nu facìa bonu se li piglia cu fazza opere te bene?
San Pietru nu sapìa cchiui ce ìa dire; ogni discorsu ca li purtà allu Signore se truà sempre contru na pezza ca mintìa an gloria Mesciu Giuanne.
-
Armenu, tisse, tinimulu nu paru te seculi an prova, bitimu comu se comporta prima lu facimu santu.
-
Va bene, San Pietru, te sia concessu! Te lu lassu arretu alla Santa Porta comu tiscipulu beatu dimoduchè cu lu poi controllare cu Santa Pacienzia. Poi, se alla fine te li do’ secoli s’ha cumpurtatu bonu, li truamu nu postu an Paratisu comu santu.
-
Però, Signore, famme na crazia: l’hai cumannare se stecia cittu e mutu pe’ tutti li do’ seculi, quiddhru ca ite ite e quiddhru ca sente sente, ca se no issioglia me mpaccisca.
-
Va bene, San Pietru. Amme e cosi sia!
(continua crai o nu giurnu te quisti quai)