Cap. XIII (Parte D)
QUANNU MESCIU GIUANNE SE PRISINTAU A SAN PIETRU
-
Insomma, – continuau lu mesciu – comu rriau a Calimera, na tuminica, itte ca alla chiazza nu nc’era mancu n’anima. Le campane sta sunàne missa pe’ l’urtima fiata.
-
Tici ca aune ragione? – pinsàu. – Tici ca hane ciuti teveru tutti a missa? Stu preite ca ticune deve essere teveru trittu.
Te lu largu, itte nu ecchiarieddhru ca sta se mmaniscià cu trasa alla chiesia prima spicciane l’urtimi rintocchi.
-
Ehi, fratello! – Li critàu. – Dove sono i tuoi consimili, che non veggo niuna anima in codesto luogo?
-
Ce voi signuria? Nu viti ca sta vau alla chiesa? Ce cumandi?
-
Dite fratello, è vero che in codesto paese abita un prete tanto straordinario che tutti gli vogliono bene?
-
Sissignore! Evangelos Papàs se chiama e ci ne lu tocca lu ndilissamu a sangu! Veni, veni cu mmie ca viti cu l’occhi toi e tanti cu le mani. Veni e viti quanta gente vae lu senta priticare.
-
Frate Briziu trasìu intra ddhra chiesia china china te cristiani ca nu nci caccià cchiui mancu na spingula, ma a stienti ìa riuscitu se fazza nu picchi te postu, ca se mise te pressa le manu sulle ricchie cu nu senta ce dicìa lu preite te lu pulpitu.
-
Eh! – fice San Pietru. – e ce dicìa mai?
-
Ce dicìa? Mo’ te ticu chieu! Per esempiu, se ìa parlare te la Trinità, facìa nu ragionamentu tantu longu e nturtigliatu a gnommaru ca, alla fine, cu se nessa te li nuti ca ìa taccati allu filu te lu discorsu, sicutà cu pretica te cose ca nu stìane né an cielu né an terra, ma ca an conclusione lu purtàne trittu trittu all’interesse sou, ca inìa prima te tuttu, e cussì te la trinità cia spiccià alla carità; te la carità se ne issìa cu la questione te la verità e, siccomu nu sapìa comu ìa concludere lu discorsu, se ne issìa critannu: “In vino veritas! In vino veritas!” e crità sta “veritas” cu na uce ca parìa nu tronu tantu rimbombante ca facia trémane puru li scanni te la chiesia.
-
Possibile?
-
Sineee! Li cristiani se cuardàne unu l’auru senza capiscane nienzi, ma stu discorsu li piacìa percé cu sta storia te la “veritas”, prima se cunfessane, se putìane mbriacare cu quarche litru te mieru ca, secondu le “verità” te lu preite, quantu cchiù mieru se bbìane menu bucìe ticìane a rretu lu confessionile e putìane cuntare tutti li piccati loru, nella “piena veritas”, comu megliu ulìane senza se lurdane l’anima. Alli cristiani nu li parìa veru ca se putìane nquazzare te mieru senza fazzane piccatu e anzi ìane capitu ca cussì facennu ìane n’assoluzione cchiù frisca e scucitata e perciò, cu l’aggiane cchiù cranne ancora, li purtàne na buttiglia puru allu preite ca l’ìa dare l’assoluzione. E cussì cunfissati e cunfissore facìane ogni giurnu festa cranne. E ce bissìa te la ucca te dhri cristiani, poi, nu te ticu cu la lingua spranta e lu cervieddhru stunatu te tanti mienzi quinti te niurumaru.
-
Ah, eccu! Moi sta capiscu! Allora, tie an posta te n’hai inutu an Paratisu cu ddhru buttiglione te mieru? Cu dimostri ca tici sempre la verità?
-
Beh, San Pietru miu, sai comu ete no? Fane ca dentu santu puru chieu, nu imu festeggiare? E ce festa ete se nu ne bimu nu picchi te vin santu?
-
E ce boi te mbriachi puru a quai? – fice San pietru largannu le razze spacinziatu.
-
None, ce centra? – rispuse lu Mesciu cu lu tranquillizza. – Cu tutti li Santi ca nc’ete an paratisu, si e no li tocca nu mienzu quintu pitunu. Comu facune se mbriacane?
-
Va bene, lassamu perdire. Tantu, tie santu quannu dienti? Timme chiuttostu te dhri preiti ca hai ruinati.
-
Tie nu te preoccupare pe’mie ca la santità nu se pote negare a ceddhri! Armenu, cussì se dice no?
-
Va bene, lassamu perdire! Timme cchiù tostu te Frate Briziu. Comu fose ca lu struncunisciara?
Mesciu Giuanne cutulau la capu te tritta a mancina scunsulatu.
-
Ca se quiddhru nu se fice li fatti soi!
-
Frate Briziu ìa rimastu senza parole te fronte a st’omelia, ma quannu itte ca lu preite pigliau na buttiglia te mieru e ncignau a bire sullu pulpitu cu decia l’esempiu, nu nci itte cchiui e cuminciàu a critare: – Eresia! Eresia! La chiesa non è postu pe’ bacordi! Vegognative! Cercati perdonu a Diu! Pentitive! Pentitive! – e cussì facennu ncignàu spinga li cristiani te na parte all’aura senza ritegnu; a ci li tirà nu razzu, a ci lu ziccà pe’ piettu, a ci li crità intra le ricchie, cu l’occhi te fore, russu russu an facce, animatu te santa passione pe’ la missione ca ìa purtare sulla terra, friscu friscu te stutiu te tutte dhre cose te lu Signore ca s’ia mparate. Nu te ticu ce successe intra la chiesia. Lu prete gricu mpizzicàu! Fra lu mieru ca s’ia biutu e le accuse te Frate Briziu ncignau cu crita comu li pacci: “Ci sinti tie ca disturbi la missa te li cristiani? Come te permetti tie cu faci peccatu contru la cungreca e la confraternita te sta’ cristiana assemblea?”
Ma Frate Briziu nu li rispuse mancu.
-
Scindi te ddhrai! – li critàu. – Te fazzu vitere ieu la “veritas!” – E senza mancu spetta ‘na risposta ncignau saglia li scaluni te lu pulpitu a ddoi a ddoi.
-
Castimatore! – li critàu e quannu li inne a tiru, lu pigliau pe’ razzu e ncignàu lu tira abbasciu critannu comu li pacci.
-
Scomunicatu! Mbriacune! Scindi te lu pulpitu te San Pietru! Péntite! Péntite!
(continua crai o nu giurnu te quisti quai)